da ser Jan-Andrea Bernhard
Igl apiestel Pieder stat avon ina gronda sfida: Ella casa dil capitani Cornelius duess el raquintar en paucs plaids digl agir, murir e levar da Jesus da Nazaret, aschia ch’in e scadin capescha. Co sa el mussar als presents ch’igl agir da Jesus ei saluteivels per tut ils carstgauns, gie per tut ils pievels, era pagauns? Co sepresenta l’efficacitad digl agir da Jesus Cristus en nies mintgagi?
Il plaid da Pieder muossa ch’el ha fatg ina gronda scoperta – forsa nunvulend: L’efficacitad digl agir da Jesus en nies mintgagi entscheiva leu nua che nus entschevin a crer enten el. Nossa cardientscha ei il fundament che siu agir sa haver consequenzas quotidianas ed effectivas en viver e murir. Nossa cretta ei il fundament che la levada daventa realitad buca mo da Pastgas, mobein en nies mintgagi. Nossa fei ei il fundament dil perdunament da nos muncaments, dalla remischun da nos puccaus.
E mira: La levada daventa mintga gi, per tuts che creian enten el. Pertgei: Aschi car ha Deus teniu il mund ch’el ha dau siu persulnaschiu fegl, sinaquei che scadin che crei en el mondi buc alla malura, mobein hagi la veta perpetna (cf. Gn 3,16).
Fatgs 10,34a.37–43
Lez dis ha Pieder priu il plaid e detg: Vus saveis tgei ch’ei daventau ell’entira Giudea, entschevend en Galilea suenter il batten che Gion ha annunziau: Co Dieus ha unschiu Jesus da Nazaret cun Spert e cun forza, co quel ei ius per la tiara entuorn ed ha fatg dil bien e medegau tut quels che stevan sut la pussonza dil giavel; pertgei Dieus fuva cun el. E nus essan perdetgas da tut quei ch’el ha fatg ella tiara dils Gedius ed a Jerusalem. El han ei pendiu vid il lenn e mazzau. Mo Dieus ha leventau el il tierz di ed ha schau cumparer el, buc a tut il pievel, mobein allas perdetgas destinadas da Diu ordavon: A nusgiuvnals, che vein buiu e magliau cun el suenter sia levada dils morts. Ed el ha cumandau a nus d’annunziar al pievel e d’attestar: Quel ei destinaus da Diu per derschader dils vivs e dils morts. Dad el dattan perdetga tut ils profets: Scadin che crei enten el contonscha tras siu num remischun dils puccaus.
