da sur Marcus Flury
In dils dudisch, Judas, ei buca pli. Mo els lessan puspei il diember cumplein, damai ch’ils apostels representan las dudisch schlatteinas dil pievel eligiu. Els ein il fundament dil niev pievel da Diu.
L’elecziun digl apiestel che duei remplazzar Judas schabegia entras differents pass che muossan ina gronda fidonza egl operar dil sogn Spert. Igl emprem ha la cuminonza cristiana astgau proponer persunas. La suletta cundiziun ei stada: Ils proponi ston saver dar perdetga dalla levada da Jesus. Barnabas e Mattias ein vegni proponi. Lu han ils apostels urau che Dieus muossi tgeinin ch’El ha eligiu. Sinquei eis ei vegniu tratg la sort, ina moda e maniera ch’era da gliez temps usitada per eruir la voluntad da Diu. Mattias ei vegnius tschernius e vegnius acceptaus sco in dils dudisch.
Pieder ed ils auters apostels han buca temiu ch’in falliu savessi vegnir eligius. Els han cartiu egl operar dil sogn Spert perfin en structuras bunamein democraticas, pia en structuras da quest mund. Viver el mund vul dir, viver el temps actual e crer ch’il sogn Spert opereschi era en nies temps ella Baselgia ed era entras fuormas da quest temps.
Fatgs 1,15–17.20a.20c–26
Lez dis ei Pieder sesalzaus enamiez ils frars – ei fuva en tut entuorn tschienevegn – ed el ha detg: Frars! Secumplenir stueva il plaid dalla Scartira ch’il Spert sogn ha predetg sur da Judas tras la bucca da David. Judas ei daventaus il menader da quels che han mess a ferm Jesus. El udeva tier nus e veva part dil medem survetsch.
Pertgei ei stat scret el cudisch dils psalms:
Siu uffeci survegni in auter.
Igl ei pia necessari ch’in dils umens ch’ein stai cun nus igl entir temps ch’il Segner Jesus ei vivius en nies miez, naven dil batten da Gion tochen il di ch’el ei vegnius alzaus naven da nus. Da quels duei in esser ensemen cun nus perdetga da sia levada.
Cheu han ei proponiu dus: Giusep, cun num Barnabas, che vegneva era numnaus Justus, e Mattias. Lu han ei urau: Segner, ti enconuschas ils cors da tuts; muossa tgeinin da quels dus che ti has eligiu per surprender il post da quei survetsch ed uffeci d’apiestel. Pertgei Judas ha bandunau el ed ei ius el liug che auda ad el.
Lu han ei tratg la sort, e la sort ei curdada sin Mattias, ed el ei vegnius quintaus tiels endisch apostels.
