da sur Alfred Cavelti
Betel era in impurtont center religius en Israel. Quei liug concurrenzava cun Jerusalem, nua ch’il tempel sesanflava. Betel schai el reginavel dil nord, Jerusalem ella tiara da Juda. Suenter il retg Salomon era il reginavel da David sedividius en duas parts che vevan buc adina la pasch ina cun l’autra. Amos deriva ord la tiara da Juda ed operescha ella tiara d’Israel. Perquei il camond ad el: Va leu, nua che ti s’audas. Mo Amos sedefenda e numna la raschun per sia missiun a Betel. El ha buca tschercau quei plaz e quella missiun sez. El che presenta sesez sco pur da nuorsas e cultivader da figs, el ei buca profet da professiun. El ei profet perquei che Dieus sez ha clamau el e dau quella incarica ad el.
Quei passus muossa che Dieus cloma carstgauns en siu survetsch, independentamein da lur derivonza, lur stan e lur clamada.
Am 7,12–15
Lezs dis ha Amazja, il sacerdot da Betel, tschintschau cun Amos: Visiunaril’expressiun ha cheu plitost ina nota negativa, va e fai che ti vegnies puspei ella tiara da Juda! Leu pos ti magliar tiu paun e profetisar. Mo a Betel astgas ti buca pli far il profet. Pertgei quei ei in sanctuari dil retg ed in tempel dalla naziun.
Amos ha rispundiu ad Amazja: Jeu sun buca profet, appartegnel buc al stan da profets. Jeu sun in pur da nuorsas e cultiveschel figs. Mo il Segner ha tratg naven mei dalla muntanera, ed il Segner ha detg a mi: Si, va e profetisescha a miu pievel dad Israel!
