· 

16. dumengia ordinaria (B) – emprema lecziun

da Maria Cristina Derungs-Bartolomei

Il maletg dil pastur cun sia muntanera ei frequents ella Bibla. El corrispunda alla realitad socio-economica dil proxim orient, ed ei ius en egl evangeli da sogn Gion. La metafra indichescha ina relaziun d’affect, exprimida cun igl enconuscher vicendeivlamein la vusch e la persuna. La veta ei relaziun e sa esser viva mo ella relaziun – ton che quei ei serevelau era tier Dieus sez, cu ins plaida da Diu-Trinitad. Quella metafra ei denton empau isada giu. Tuttina s’udess la realitad denunziada tier il profet Jeremias tuttavia buc al vargau. Trestas historias de aults exponents della hierarachia catolica ni exempels de «pasturs» che miran buca al bien dils fideivels, mobein a lur ambiziuns de carriera: Tut quei ei aunc ussa actual.

Jesus ha denton «giu cumpassiun» de tuts; el sez ei il bien pastur de tut las nuorsas. Sund’jeu promts ded ir las vias digl evangeli de Jesus? Suondel jeu il «bien pastur intern» q.v.d. la vusch della cunscienzia? Enquer’jeu la direcziun cun tedlar sil bien pastur ch’ei il Plaid de Diu? La finala dat ei mo in punct fix da suandar: che il Segner seigi nossa giustia, sco la lecziun dil profet Jeremia di, il ligiom da veta – ton per pasturs sco per muntaneras.

Jer 23,1–6

Paupra ils pasturscheu in maletg per ils retgs che lain ir a frusta las nuorsas da mia pastira, che lain ir a piarder ellas, plaida il Segner. Perquei di il Segner, il Diu d’Israel, als pasturs che paschentan miu pievel: Spatitschau, spuentau veis vus mias nuorsas enstagl da mirar dad ellas. Uarda, uss castigel jeu vus pervia da vies malfar, di il Segner. Jeu mez vi rimnar il rest da miu triep ord tut las tiaras, nua ch’el ei spatitschaus tras mei, e meinel el puspei sin mia pastira. Leu duein ellas esser fritgeivlas e secarschentar. Leu vi jeu pladir pasturs che paschentan ellas, ch’ellas ston buca pli temer e ver sterment, che buc ina dad ellas va a piarder, plaida il Segner. Uarda, ei vegn a vegnir il temps, di il Segner, che jeu leventel a David in fegl da giustia. Quel vegn a reger sco retg en sabientscha, e vegn a salvar dretg e giustia ella tiara. Duront ses dis retscheiva Juda agid, ed Israel vegn a viver en segirtad. E quei ei il num ch’el vegn a purtar: Il Segner, nossa victoriaatgnamein nossa giustia.

Download
Versiun per stampar
Onn current 16 B.pdf
Adobe Acrobat Dokument 87.9 KB

☛ evangeli dalla dumengia: Mc 6,30–34