da sora Armina Maissen
«Observei ils camonds e tschentaments da Diu» (cf. Dt 6,2). Quei che Moses ha recumandau al pievel da gliez temps vala per tut las generaziuns, tochen il di dad oz. Dieus ha tschentau sias leschas en la scaffiziun. «Sias leschas ein perfetgas » (Ps 19,8). Setegn il carstgaun vida quellas, vegn el menaus dil Segner ed ei va bein cun el. Disturba el quellas leschas, sto el baul ni tard pitir. Jeu selubeschel ord quella perspectiva da metter il temps dad oz in tec en damonda. Va ei veramein aschi bein cun nus? Jeu dubetel quei. Ein las leschas dil Segner integradas avunda en nossa societad, en la politica, en il sectur econom? Havein nus buca schon surpassau memia fetg ils condaments da Diu e disturbau siu plan?
«E ti dueias tener car il Segner tiu Diu da tut tiu cor, da tut ti’olma e da tut tia forza» (Dt 6,5). Ei quei buca ina pretensiun nunpusseivla per nus carstgauns, influenzai da sentiments, che disponan pli u meins sur da nies mintgadi. Jesus declara el Niev Testament, co quei ei pusseivel per nus, tgei che carezar Diu vul dir. Ed el metta puspei ses condaments el center: «Tgi che ha mes camondaments ed observa els, quel eis ei che careza mei» (Gn 14,21).
Dt 6,2–6
Moses ha plidau tier il pievel e detg: Respectahagies stema per el il Segner tiu Diu ed observa ses camonds e tschentaments che jeu ordeinel a ti, per che ti vivies ditg.
Sche teidla els pia, Israel, e mira d’observar els stediamein, sinaquei ch’ei mondi bein cun tei e vus vegnîes en ina tiara che fluescha da latg e mèl, sco il Segner, il Diu da tes perdavons, ha empermess a ti. Teidla Israel: Il Segner nies Diu ei in unic Segner. E ti dueis tener car il Segner tiu Diu da tut tiu cor, da tut ti’olma e da tut tia forza. Ed ils plaids che jeu camondel a ti oz duein esser enscrets en tiu cor.
