da sur Marcus Flury
Naaman, in general dalla Siria, era daventaus leprus. Tiel profet Elischa sperav’el d’anflar migliurament. Lez dat ad el il sempel cussegl da far bogn el Jordan. Quei act ha purificau el. Ussa vul el mussar si’engrazieivladad entras in regal. Mo il profet refusescha quei detschartamein. La purificaziun ei buc in meret dil profet, mobein in regal da Diu ch’ins sa buca pagar, damai ch’el ei gratis, ei grazia.
Naaman duei venerar sulettamein il Diu d’Israel e buc autras divinitads. Las divinitads eran lu divinitads localas, quei vul dir, ellas vegnevan veneradas mo en lur tiara ed agevan mo leu. Ord quei motiv pren Naaman tratsch ord Israel per ereger sin quel en Siria in altar e presentar unfrendas al sulet Diu, quel d’Israel. Per nus cristians ei Dieus buc fixaus sin in territori ni ina tiara. Ad el audan tschiel e tiara.
2 Re 5,14–17
Lezs dis ei Naaman dalla Siria ius giu ed ha fatg siat ga bogn el Jordan, sco igl um da Diu veva cumandau. Cheu ei siu tgierp puspei vegnius purificaus dalla lepra e daventaus sco il tgierp d’in affon pign. Sinquei eis el returnaus tier igl um da Diu, el e sia suita. Ed arrivaus leu, passa el avon el e di: Mira, ussa sai jeu ch’igl ei buca d’anflar in Diu sigl entir mund auter che mo en Israel. Sche accepta pia in regal da tiu survient.
Mo lez di: Schi franc ch’il Segner viva, al qual jeu surveschel, jeu prendel nuot. L’auter ha insistiu ch’el prendi, mo el ha buca vuliu. Cheu di Naaman: Sche buc, lu vegli ins dar a tiu survient ina carga tratsch, ton sco dus mels pon purtar. Pertgei tiu survient vul buca presentar vinavon unfrendas e sacrifecis ad auters dieus che mo sulettamein al Segner.
