da sur Marcus Flury
Nus carstgauns vein la tendenza da parter en ils carstgauns en buns e schliats. Quei sa valer per singuls carstgauns, mo era per entirs pievels. Nus manegein che Dieus duessi patertgar ed agir tuttina. Mo lu stuein nus constatar che Dieus ha pazienzia era culs schliats e dat ad els la pussaivladad da seconverter e nus sedumandein: Ei quei gest? Dieus sto buca cumprovar siu agir en gestadad. En carezia ha el quitau da tuts, ei gests ed agescha mai a moda arbitraria. Siu agir lai el buc tschentar en damonda entras carstgauns pussents. Sia giustia universala lai buca tier ch’in carstgaun che ha buca meritau ei, vegni sentenziaus.
Pussonza ei mo lu pussonza sch’ella ei gesta. Dieus drova sia pussonza buc a moda arbitraria e senza respect, mobein a moda nunpartischonta, cun migeivladad e schanetg, pia tut auter che nus carstgauns.
Sab 12,13.16–19
Ei dat buc in Diu che sempatscha da tut, auter che ti, aschia che ti stuesses mussar che ti giudicheschas buca malgest.
Tia forza ei il fundament da tia giustia, ed il fatg che ti regias sur da tut ei motiv da pazienzia per tei. Ti muossas tia forza, sch’ins crei buc en tia pussonza suverana, e tier quels ch’enconuschan ella castigias ti la rebelliun. Perquei che ti disponas da pussonza, giudicheschas ti cun migeivladad e diregias nus cun gronda pazienzia. Tia pussonza stat gie a disposiziun cura che ti vul.
Entras in tal agir has ti instruiu tiu pievel ch’il gest duei esser buntadeivels. Ti has dau a tes affons la speronza che ti laias aunc plaz alla cunversiun suenter ch’ins ha fatg puccau.
