dad Andri Casanova
Cu ei va bein cun nus, po ei capitar che nus emblidein che quei sa esser auter e che auters stattan forsa buc aschi bein. A quei patertgar far era la lecziun dad oz allusiun.
Il pievel d’Israel era staus en sclavaria ell’Egipta. Sin via ord l’Egipta era els aunc buca satisfatgs ch’ei vegni propi ad ir meglier cun els. En quella situaziun malguessa ha il Segner dau sias ordras, ordras che fan endamen da ver quitau dils jasters, dallas vieuas, dils orfans e dils paupers. Pia aunc avon ch’ei mondi bein cun els, ha il Segner clamau en memoria quels che han buc aschi lev en lur veta.
E Dieus ha supplicau da clamar mintg’onn en memoria quei, tochen sil gi dad oz, tochen en nies mintgagi e nies dafar.
Ex 22,20–26
Aschia plaida il Segner: Buca mulesta igl jester e buca squetscha el, pertgei vusezs essas stai sco jasters ella tiara d’Egipta. Buca supprimi vieuas ed orfans; pertgei sche ti supprimas els, ed els greschan tier mei, sche vi jeu per franc exudir lur grir, e mia gretta vegn a s’inflammar, e jeu vegn a mazzar vus culla spada, che vossas dunnas daventan vieuas e vos affons orfans.
Sche ti emprestas daners ad in da miu pievel, ad in pauper sper tei, sche dueis ti buca far da ranver cun el; vus dueis buca pretender tscheins dad el. Sche ti fas dar enzatgi il manti per pègn, lu tuorna quel avon ch’il sulegl mondi da rendiu. Quel ei numnadamein tut quei ch’el ha per secuvierer. Cul manti cuviera el siu tgierp, sut el semett’el a durmir. Sch’el cloma tier mei, vi jeu tedlar el, pertgei jeu sun plein cumpassiun.
