· 

4. dumengia d’advent (A) – emprema lecziun

da Flurina Cavegn-Tomaschett

David ha giu success. El ha cumbattiu ses adversaris ed ha priu dimora a Jerusalem. Sco engraziament per tut il contonschiu vul el medemamein ereger a Diu ina casa, per ch’era lez prendi dimora a Jerusalem. Denton sco schi savens vegn ei auter: Dieus ei buca cuntents cun ils plans da David, mobein vul sez ereger «ina casa» per David, ina che cuoza a semper. Quei messadi tarmetta Dieus a David entras il profet Natan, pli exact en in siemi. Cheutras vegn veseivel che l’empermischun da Diu fatga enviers ils babuns dil pievel d’Israel, serealisescha en David.

2 Sam 7,1–5.8b–11.16

Cu il retg David seseva inaga en siu palaz – il Segner veva dau ruaus ad el da tut ses inimitgs entuorn ed entuorn – di el al profet Natan: Mira, jeu stun en ina casa da ceders, mo l’arca da Diu stat sut la tenda.

Natan rispunda al retg: Bien pia, pér fai tut quei che ti has el senn da far, pertgei il Segner ei cun tei.

Mo aunc quella notg ha il plaid dil Segner inspirau Natan: Va e di a miu survient David: Aschia di il Segner: Duesses ti baghegiar ina casa per mei, che jeu avdi lien?

Jeu hai clamau tei naven dalla pastira e naven dallas nuorsas, sinaquei che ti daventies regent sur da miu pievel d’Israel. Jeu sun staus cun tei dapertut nua che ti eis tilaus, ed hai sragischau tut tes inimitgs avon tes egls. Jeu vi dar a ti in num eguals al num dils pli gronds sin tiara. E jeu vi preparar in liug a miu pievel d’Israel ed implantar el leu ch’el sappi avdar leu en ruaus e stoppi buca ver tema pli, e che sfarfatgs sappien buca turmentar el pli sco pli baul. Tia casa e tiu reginavel duein star statteivels avon mei per adina; tiu tron duei star ferms a semper.

Download
Versiun per stampar
Advent 4 B.pdf
Adobe Acrobat Dokument 81.4 KB

☛ evangeli dalla dumengia: Lc 1,26–38