dad Andri Casanova
La lecziun ord la brev a quels da Filippi ei in himni, pia ina poesia da laud. El resumescha cun paucs plaids la veta terrestra da Jesus Cristus e numna sia muntada. L’emprema part descriva ch’el ei daventaus carstgaun, pia igl eveniment da Nadal: Dieus sesbassa e daventa carstgaun. Lu suonda ella secunda part la humiliaziun en la mort vid la crusch, pia Vendergis sogn. Ella tiarza part vegn lu igl alzament e la glorificaziun ch’ei la levada da Pastgas.
Nus vesein en quella via da Cristus che quei che para dad esser ina curdada, po era menar alla levada. Cun Cristus da nossa vart sto negin da nus senuspir dad ir sia via.
Fil 2,6–11
Schegie che Jesus Cristus
fuva en la fuorma da Diu,
ha el buca taxau ei sco in bein da rapina
dad esser aduals a Diu.
El ha biaronz spogliau sesez,
ha acceptau la fuorma da fumegl
ed ei daventaus semeglionts als carstgauns.
Taxaus en sia cumparsa exteriura sco in carstgaun,
eis el sehumiliaus,
ei daventaus obedeivels entochen la mort,
gie tochen la mort vid la crusch.
Perquei ha Dieus alzau el sur tuts
e dau ad el in num che survarga scadin num,
sinaquei ch’el num da Jesus
sestorschi mintga schanugl
en tschiel, sin tiara e sut la tiara,
e che mintga lieunga confessi:
Jesus Cristus ei il SignurEl grec ha ei num «kyrios», pia il Segner. Cheutras vegn fatg allusiun a siu esser divin.
per la gloria da Diu, il Bab.
☛ evangeli dalla dumengia: Mc 11,1–10 (B)
☛ 1. lecziun dalla dumengia: Jes 50,4–7 (ABC)
☛ passiun: Mc 14,1–15,47 (B)
