da Marcel Köhle
La lecziun da questa dumengia ei admoniziun e encuraschament en ina. Igl autur dalla brev da sogn Gion plidenta fermamein ses lecturs d’observar ils condaments da Diu. Mo tgi che tegn ils condaments, quel posseda cumpleinamein la carezia da Diu.
Mo tgei schabegia sch’ins ha buca la forza da tener ils condaments? Strufegia lu Dieus ses cartents? – Ual cheu dat la lecziun encuraschament: Nus stuein buca haver tema, nus vein in che interceda per nus tier Diu: numnadamein Jesus Cristus. – Quest messadi duei accumpignar ed encuraschar las lecturas ed ils lecturs dad ir plein fidonza e fideivladad tier Diu lur via.
1 Gn 2,1–5a
Mes affons, quei scrivel jeu a vus,
sinaquei che vus fageies buca puccau.
Mo sch’enzatgi ha fatg puccau,
vein nus sco intercessur tiel Bab
Jesus Cristus, il gest.
El ei l’unfrenda d’expiaziunTenor il Veder Testament eis ei da far certas unfrendas per refar quei ch’ei rut entras il puccau. per
nos puccaus,
e buca mo pils nos,
mobein per quels digl entir mund.
Tras quei essan nus pertscharts che nus vein enconuschiu el,
sche nus tenin ses condaments.
Tgi che di: Jeu enconuschel el,
mo observa buca ses condaments,
quel ei in manzaser, e la verdad ei buc en el.
Scadin che tegn denton siu plaid,
posseda la carezia da Diu cumpleinamein en sesez.
☛ 1. lecziun dalla dumengia: Fatgs 3,13–15.17–19
☛ evangeli dalla dumengia: Lc 24,35–48
