da Maria Cristina Derungs-Bartolomei
Per liung temps han ils humans encuriu ina metoda per midar metals en aur. Adumbatten! Denton reussescha ei magari de midar aur en metal. Secapescha en in senn metaforic. Quei schabegia cura che duns che vegnan schenghegiai da Diu als carstgauns vegnan pri si sco buordis, sco grevs camonds.
Aschia sa ei capitar ed eisi effectivamein capitau cun il «sabat», cun il camond de tschessar dalla lavur, de sedistaccar dals quitaus dil mintga di, dalla tscherca dil gudogn e de dedicar in di al ruaus. Diu damonda in di per el, mo per schenghiar quel al carstgaun, al basegns de vegnir tier sesez, haver peda per meditar, contemplar, scumiar patratgs; ina pausa nua che l’olma ed il spért san trer flad.
Tuts ston guder quella condiziun de libertad dalla fadigia, era survients ed animals. Quei ei ina regurdienstcha dil siatavel di della creaziun, ed era della liberaziun dalla sclavaria en Egipta. Buca adina ha ei dau e buca dapertut dat ei il ritmus de lavur e ruaus che nus gudin en nies mund e che dependa da quei vegl condament. Vegn la dumengia capida e vivida en engraziament sco dun? Ni intepretada sco duer displascheivel che impedescha ad ins de s’occupar de sias fatschentas? Ferton ch’ella liberescha ins dalla sclavaria dellas «fatschentas»!
Dt 5,12–15
Aschia plaida il Segner: Mira che ti sanctificheschies il di dil sabat, sco quei ch’il Segner tiu Diu ha ordinau a ti. Sis dis sas ti luvrar e far tut tias fatschentas, mo il siatavel di duei esser in sabat per il Segner tiu Diu. Buc ina lavur dueis ti far: Ni ti, ni tiu fegl, ni tia feglia, ni tiu survient, ni tia survienta, ni tiu bov, ni tiu asen, ni in da tes animals, ni il jester che stat enteifer tias portas, per che tiu survient e tia survienta sappien ruassar sco ti.
Seregorda che ti eis staus sclav ella tiara d’Egipta e ch’il Segner tiu Diu ha menau tei orda leu cun maun ferm e cun bratsch stendiu. Perquei ha il Segner tiu Diu cumandau a ti da celebrar il di dil sabat.
