da Maria Cristina Derungs-Bartolomei
La brev de sogn Giachen ei stada in crap de scarpetsch denter catolics e protestants, oravontut pervia della passascha che vegn avon ella lecziun ded oz. Quella para de sereferir en moda polemica alla ductrina de sogn Paul, che suttastreha co il salit vegni dalla cardientscha e buca dallas ovras. Ils catolics fussen pia cun Giachen, dalla vart dellas ovras; ils protestants cun Paul, dalla vart della cardientscha.
Il temps dellas carplinas e dellas controversas confessiunalas ei, grazia a Diu, vargaus. E quei lubescha de capir endretg ton Giachen sco Paul. Giachen admonescha de dar alla cardientscha expressiun concreta en ovras. Haver cardientscha vul dir haver fidonza en Diu, renconuschend che tut vegn dad El sco regal. E quei duei semussar ella tenuta enviers ils concarstgauns, el far obedientscha alla «lescha suprema» (Gc 2,8) che ei il camond de carezar il proxim sco sesez, ellas «ovras». Pia «suandar il Plaid e buca esser mo auditurs de quel» (cf. Gc 1,22). Quei stat buca en opposiziun a quei che stat a cor a Paul, numnadamein ch’il spindrament ei ovra de Diu. Retscheiver il dun della giustificaziun spir per Grazia oblighesch’ins da render activa la cardientscha en carezia (cf. Gal 5,6).
Gc 2,14–18
Mes frars, tgei nezegia quei, sch’enzatgi di ch’el hagi cardientscha, mo ha buca bunas ovras? Po forsa la cardientscha spindrar el?
Sch’in frar ni ina sora ein per exempel senza vestgadira, ed ei maunca ad els il paun da mintga di, in da vus denton di ad els: Mei en pasch! Sescaldei e dustei la fom! mo dat buc ad els quei ch’els basegnan pil tgierp – sche tgei gida quei?
Aschia ei era la cardientscha morta en siu intern, sch’ella ei buca accumpignada dad ovras. Mo enzatgi savess dir: Ti has cardientscha, e jeu hai bunas ovras. Muossa a mi tia cardientscha senza ovras, e jeu vi mussar a ti mia cardientscha tras las ovras.
