da sora Armina Maissen
Tgei immensa sfendaglia denter quels dus cuntrasts: «scuidonzae carplina…» e migeivla ed innocenta «sabientscha da surengiu». E tuttina, quels cuntrasts existan omisdus en nies mund.
En nus schai il sem dil bien e dil schliet, las vertids ed ils vezis. Il bien ed il schliet han leu sia entschatta. Ei dapenda denton da nus, a tgei sem che nus dein nutriment. Sco il «fretg da giustia vegn semnaus en pasch a quels ch’enqueran la pasch», aschia prosperescha il sem da scuidonza, nauschadad e carplina en quels, ch’enqueran mo profit, pussonza e plaschers mundans. E cheu entscheivan las uiaras.
Co baghegiar cheu ina punt? Havein nus propi neginas schanzas da purtar el mund intec migeivladad, pasch e glisch? Bein, Jesus dat a nus in recept: «A vus, che tedleis ditgel jeu: … benedi quels che smaledeschan vus, urei per quels che offendan vus.» (Lc 6,27–28). Jeu dun tier – quei ei buca lev – giudicar e sevilar va era tier mei pli tgunsch. Mo jeu fetschel schon en mia cuminonza persenn, co il benedir e co l’oraziun ina per l’autra sa midar conflics el bien. El pign sto ei entscheiver, quei che vul daventar grond e serasar ora el mund.
Gc 3,16–4,3
Mes cars! Nua ch’ei regia scuidonza e carplina, leu ein era disuorden e scadina nauschadad.
Mo la sabientscha da surengiu ei oravontut innocenta, plinavon pacifica, migeivla ed obedeivla, plein misericordia e buns fretgs, senza partischontadad e simulems.
In fretg da giustia vegn semnaus en pasch a quels ch’enqueran la pasch.
Danunder derivan las uiaras e danunder las dispettas en vies miez?
Vegn quei buca ual da vossas pissiuns che fan uiara en vossa membra?
Vus garegeis, mo possedeis nuot. Vus essas spir odi e scuidonza e saveis contonscher nuot. Vus fageis uiaras e polemicas e vegnis tonaton tier nuot, perquei che vus rugheis buc. Ni forsa rugheis
vus e retscheveis nuot, perquei che vus ureis mal, mo cugl intent da sfarlatar tut en vos plaschers mundans.
