da sora Armina Maissen
Tier quella lecziun vegn a mi spontan endamen ina detga che jeu hai legiu inagada, che jeu sai denton buca documentar exactamein ed era buca tgi che ha scret quella.
Ei era inagada in carstgaun fetg beinstont – jeu dun ad el il num Justinus – che viveva mo da profit e sesenteva pli perderts e renomaus che «normals moribunds». E quel ei morts. El ei immediat s’annunziaus tier sogn Pieder, manegiond, ch’el sappi ussa entrar en ina vella pompusa. El seigi ussa cheu e mirassi bugen sia biala avdonza.
«Gie, quella saiel jeu gest mussar a Vus», di sogn Pieder. Els vegnan tier ina camona quasi vita e ch’ei baghegiada mo cun slondas. Justinus ei perplexs e sevila sc’in rustg: «Tgei, saveis Vus buc, tgei renomau e beinstont um che jeu sun staus sin tiara, che Vus deis a mi aschia enzatgei?»
«Bein, bein», di sogn Pieder en tutta ruasseivladad. «Nus havein baghegiau Voss’avdonza successivamein correct cun quei, che Vus haveis adina puspei furniu a nus.»
Cheu drova ei segir negins auters commentaris!
Gc 5,1–6
Fagei adatg, vus rehs: Bargi e lamentei pervia dallas tribulaziuns che han da vegnir sur da vus!
Vossa rihezia smarschescha, e vossa vestgadira vegn magliada da mulauns. Vies aur ed argien fan ruina; e lur ruina vegn a dar perdetga encunter vus. Sco in fiug vegn ella a consumar vossa carn.
Aunc ils davos dis rimneis vus scazis.
Mirei: La pagaglia dils luvrers che han segau vos praus e che vegn retenida malgestamein da vus, quella cloma dad ault, e las lamentaschuns dils parders ein vegnidas ad ureglia al Segner dallas
armadas.
Vus veis viviu sin tiara en plaschers e gudiments, sco il di da mezca veis vus engarschau vos cors.
Vus veis condemnau e mazzau il gest, ed el fa buca resistenza a vus.
☛ 1. lecziun dalla dumengia: Num 11,25–29
☛ evangeli dalla dumengia: Mc 9,38–43.45.47–48
