da Marcel Köhle
La Palentada ei il davos cudisch dalla Bibla. Igl ei in cudisch fetg profetic e cun biaras visiuns. Entras siu messadi ei quei cudisch daventaus per ils cristians e las cristianas el temps dallas persecuziuns egl Imperi roman tier in tractat che deva speronza e confiert en muments da repressiun.
Ual ella lecziun da questa dumengia, la fiasta da Cristus Retg, presenta il profet Gion a nus Jesus Cristus sco il ver regent da quest mund. – Sche Jesus tuorna (tgei che Gion ha propi spitgau per siu temps), lu vegnan tut ils regents e signurs da quest mund a stuer reconuscher sia pussonza e mintga repressiun vegn lu finalmein ad haver ina fin.
Quella speronza silla vegnida da Niessegner e la fidonza sin sia pussonza divina less il profet Gion schenghegiar cun siu cudisch als lecturs ed allas lecturas. Quei messadi va sco in «fil tgietschen» atras igl entir Cudisch dalla palentada e duei era daventar per nus sco in «fil tgietschen» en nossa veta e cardientscha.
Pal 1,5–8
Jesus Cristus ei la perdetga fideivla, igl empremnaschiu dils morts, il regent sur ils retgs dalla tiara. El careza nus e tras siu saung ha el spindrau nus da nos puccaus. El ha regalau a nus la
dignitad da retgs e fatg esser nus sacerdots per siu Diu e Bab. Ad el seigi la gloria e la pussonza da perpeten en perpeten. Amen.
Uarda, el vegn cun las neblas, e scadin egl vegn a veser el, era quels che han perfurau el; e muort el vegnan tuttas schlatteinas dalla tiara a plonscher. Gie, daveras! Amen.
Jeu sun igl alfa ed igl omega, di Dieus il Segner. Jeu sun quel che ei, che era e che vegn a vegnir: Il Tutpussent.
☛ 1. lecziun dalla dumengia: Dan 7,13–14
☛ evangeli dalla dumengia: Gn 18,33b–37
