· 

Presentaziun dil Segner (ABC) – emprema lecziun

dad Andri Casanova

Il profet Maleahi annunzia in gi da dertgira che purifichescha il survetsch el tempel (Mal 3,3–4) e che porta giustia, nua ch’ei dat malgiustias (Mal 3,5). Il secund aspect fa buc part dalla lecziun, ei denton buca meins interessants. Ei vala la peina da leger quei vers 5 ella Bibla!

Mo tgei munta quella purificaziun dil survetsch el tempel e dils Levits? Il plaid profetic reagescha sin la critica dils Levits sezs ed animescha da reponderar lur agen agir. Era nus savein far quei. Co stat nies secuntener religius e cultic en relaziun cun nies agir social?

L’annunziaziun d’in gi da dertgira e d’in mess da Diu colligiein nus cristians cun Jesus Cristus. El realisescha quei che vegn annunziau tier Maleahi. Mo gia tier Maleahi ei quei gi e quei mess buc semplamein enzatgei futur, mobein enzatgei ch’ei gia actual. Il gi ha gia entschiet, il mess ei gia vegnius. La reflecziun da nies agir ei pia dumandada gest uss e cheu.

Mal 3,1–4

Uarda, jeu tarmettel miu mess, ch’el fetschi senda battida per mei. Il Tutpussent che vus encuris arriva nunspitgadamein en siu sanctuari e cun el igl aunghel dalla ligia, pil qual vus brameis. Uarda, el vegn, di il Segner dallas armadas. Tgi po cumprender il di da sia vegnida, tgi po resister, cu el cumpara? Pertgei el ei sco il fiug da quel che cula metal e sco la lischiva dils lavunzs. El vegn a seplazzar per cular e purificar, sco ins purifichescha argien. El purifichescha ils Levits e schubregia els, sco ins schubregia aur ed argien. Lu fan els unfrendas scosauda al Segner, e l’unfrenda da Juda e Jerusalem vegn ad esser plascheivla al Segner sco antruras els onns daditg vargai.

Download
Versiun per stampar
Presentaziun C.pdf
Adobe Acrobat Dokument 74.2 KB

☛ 2. lecziun dalla dumengia: Heb 2,14–18

☛ evangeli dalla dumengia: Lc 2,22–40