· 

Presentaziun dil Segner (ABC) – secunda lecziun

da sur Marcus Flury

La Presentaziun da Niessegner exprima che Jesus vegn vesius sco il Messias che vegn en siu tempel e s’entaupa cul pievel da Diu dil Veder Testament ch’ei representaus entras Simeon e Hanna. Mirond sin quei eveniment san ins capir che la lecziun ei vegnida prida ord la brev als Hebrès. Quella brev ha in lungatg ch’ei per nus buc aschi levs da capir. Cun agid dil Veder Testament vegnan verdads cristianas explicadas. Aschia vegn Jesus vesius sco premsacerdot. Lez veva a sias uras da far el tempel las unfrendas pils puccaus dil pievel. Jesus ei denton sez s’unfrius vid la crusch per expiar nos puccaus. Il Fegl da Diu ei veramein daventaus carstgaun, semeglionts a nus en tut. Tras quei ch’el ha priu sin el nossa sort humana tochen el murir, eis el habels da gidar nus en tuttas nossas situaziuns da veta.

Heb 2,14–18

Mes cars! Damai ch’ils affons ein ord carn e saung, ha era Jesus acceptau las medemas cundiziuns, per surventscher tras la mort quei che ha la pussonza dalla mort, numnadamein il giavel, e per liberar quels ch’eran lur entira veta teni en sclavaria tras tema dalla mort. El s’occupescha franc buca dils aunghels, mobein dils descendents d’Abraham ha el quitau. Perquei ha el stuiu daventar semeglionts als frarsIns sa cumpletar «als frars ed allas soras». en tuts graus, sinaquei ch’el seigi per els in misericordeivel e fideivel premsacerdot avon Diu ed expieschi ils puccaus dil pievel. Tras quei ch’el ha sez stuiu pitir tras tentaziuns, eis el habels da gidar quels che vegnan tentai.

Download
Versiun per stampar
Presentaziun C.pdf
Adobe Acrobat Dokument 84.8 KB

☛ 1. lecziun dalla dumengia: Mal 3,1–4

☛ evangeli dalla dumengia: Lc 2,22–40