dad Andri Casanova
Als muments da persecuziun ellas cuminonzas dall’Asia minora rispunda Gion cun sias visiuns che duein encuraschar ellas e dar forza d’esser fideivels a Cristus. En sia visiun dil tron celestial (Pal 4–5) retscheiva Jesus Cristus – il Tschut – pussonza sur digl andament dil mund. Igl ei in text da speronza che las oppressiuns terrestras tras nauschs regents vegnan survargadas e brattadas tras il laud e l’aduraziun dalla visiun.
Ils mellis e mellis dad aunghels (cf. Dan 7,10), las quater creatiras (cf. Ez 1,4–10, pli tard era simbols per ils quater evangelists) ed ils ventgaquater vegls (forsa representants dallas dudisch schlattas e dils dudisch apostels, cf. Pal 21,12.14), tut quels han intunau il laud divin che survarga las catastrofas terrestras.
Pal 5,11–14
Jeu, Gion, hai viu ed udiu la vusch da biars aunghels entuorn il tron, las creatiras ed ils vegls, e lur diember era dieschmelli gadas dieschmelli e melli gadas melli.
Els clamavan cun aulta vusch:
Il Tschut ch’ei vegnius mazzaus ei digns da retscheiver pussonza, rihezia e sabientscha, forza ed honur, gloria e benedicziun!
E scadina creatira ch’ei en tschiel, sin tiara, sut tiara e silla mar, gie scadin esser egl univers, hai jeu udiu a clamar:
A quel che sesa sil tron ed al Tschut seigi laud ed honur, gloria e pussonza da perpeten en perpeten!
E las quater creatiras han rispundiu: Amen.
Ed ils ventgaquater vegls ein sebess per tiara ed han adurau.
☛ 1. lecziun dalla dumengia: Fatgs 5,27b–32.40b–41
☛ evangeli dalla dumengia: Gn 21,1–19
