da sur Martin Bearth
Mira, jeu fetschel tut niev. In niev tschiel ed ina nova tiara. In niev Jerusalem. E Dieus vegn ad avdar en nies miez. Ei vegn buc a dar pli larmas, mort e tristezia, suspirs e dolur.
Quei empermetta Dieus a nus ella visiun da sogn Gion. Quei ei la finamira da nossa veta. Quei ein nossas Pastgas senza fin.
Aschiditg che nus essan sin via encunter casa dat ei suspirs e dolur, larmas, mort e tristezia.
Mo la via che Jesus ei ius, la via da passiun e mort cun bia larmas e tristezia, quella via ei buca stada alla fin en fossa. Alla fin da siu viadi stat la levada da mort en veta, las Pastgas senza fin e senza paregl. Quei vala era per nossa veta terrestra; ella ei in viadi tras dis ed onns da sulegl ed umbriva, mo era in viadi cun la nunballucconta speronza e fidonza el Diu che fa vonzei tut niev.
Pal 21,1–5a
Jeu, Gion, hai viu in niev tschiel ed ina nova tiara; pertgei igl emprem tschiel e l’emprema tiara ein svani, e la mar ei buca pli.
Ed il sogn marcau, il niev Jerusalem, hai jeu viu a descender giu da tschiel neu da Diu, ornaus sco ina spusa fittada per siu mariu.
Cheu hai jeu udiu ina ferma vusch a clamar neu dil tron:
Mirei, la tenda da Diu denter ils carstgauns! El vegn ad avdar en lur miez, ed els vegnan ad esser siu pievel; ed el sez, Dieus cun els, vegn ad esser lur Diu.
El vegn a schigentar mintga larma ord lur egls; la mort vegn buc ad esser pli, ed era buca tristezia. Ni suspir ni dolur vegnan ad exister pli; pertgei quei ch’era avon ei vargau.
E quel che seseva sil tron ha detg: Mira, jeu fetschel tut niev.
☛ 1. lecziun dalla dumengia: Fatgs 14,21–27
☛ evangeli dalla dumengia: Gn 13,31–33a.34–35
