da sur Martin Bearth
Cun il maletg dil «Niev Jerusalem» sesprova sogn Gion da descriver en sia visiun il niev marcau. Igl ei in «marcau» cun mirs aults e ferms entuorn ed entuorn; mirs che tegnan naven tut il mal. Mo il niev marcau ha era portas sin tuttas varts, portas aviartas per scadin viandont che vul entrar. Tempels, baselgias e capluttas drov’ei buca pli, pertgei il Segner Diu, il Retg digl univers ei siu tempel, el ei en lur miez. Era il sulegl e la glina ha il niev marcau buca da basegns, pertgei la gloria da Diu sclarescha el.
Quei ein maletgs, simbols per la nova veta che Dieus ha preparau per nus, cu nus essan alla fin da nies viadi terrester. Il Diu che ha scaffiu las milliardas steilas e tut igl univers, ha senza dubi era la forza da midar nossa veta, da far ella tut nova el niev dacasa.
Pal 21,10–14.22–23
In aunghel ha purtau mei el spért sin in cuolm da gronda altezia ed ha mussau a mi il sogn marcau da Jerusalem che descenda giu da tschiel neu da Diu, ornaus cun la gloria da Diu.
Sia splendur ei semeglionta a quella d’in fetg custeivel crap sco d’in jaspis cristallin. Il marcau ei tschinclaus d’in mir grond ed ault cun dudisch portas e cun dudisch aunghels avon las
portas; quellas portan l’inscripziun da nums, ils nums dallas dudisch schlatteinas dils fegls d’Israel.
Il marcau ha treis portas viers damaun e treis encunter mesanotg, treis portas viers miezdi e treis encunter sera. Il mir dil marcau ei tschentaus sin dudisch craps da cantun e quels portan ils
dudisch nums dils dudisch apostels dil Tschut.
In tempel hai jeu buca viu el marcau. Pertgei il Segner e Diu, il patrun digl univers, ei siu tempel, ed il Tschut.
Il marcau drova ni sulegl ni glina per sclarir el. Pertei la gloria da Diu illuminescha el, ed il Tschut ei sia glisch.
☛ 1. lecziun dalla dumengia: Fatgs 15,1–2.22–29
☛ evangeli dalla dumengia: Gn 14,23–29
