da Marcel Köhle
Ella lecziun da questa dumengia udin nus la fin dalla brev da sogn Paul a quels da Galazia. Ses plaids ein fetg persunals ed ins savess numnar quei text ina sort da testament spiritual.
Per sogn Paul ein buca success, reputaziun u reglas (sco p.ex. la surtagliada) il pli impurtont ella veta da cardientscha, mobein Cristus, il crucifigau. Quei tuna igl emprem empau curios, perquei che la crusch era per biars in simbol da cordoli e mort. Mo per sogn Paul era ella in simbol per la carezia da Diu: Tras la mort e la levada da Niessegner Jesus Cristus ha Dieus schenghegiau nova veta a nus. Quei messadi duei midar, influenzar e renovar nos cors e nossa cardientscha.
Alla fin giavischa Paul a tut ils carstgauns pasch e la vischinonza da Diu. Ses plaids regordan nus: Buca quei che tschels vesan, vala – mobein tut quei che Dieus mida e transformescha en nus. Tut quei porta pasch, carezia ed ina nova entschatta.
Gal 6,14–18
Per mei vegn ei mai en damonda da segloriar auter ch’en la crusch da Niessegner Jesus Cristus, tras il qual il mund ei crucifigaus per mei e jeu pil mund. Ei emporta nuot ch’ins seigi surtagliaus
ni buca surtagliaus. Quei che quenta ei: Esser ina nova creatira.
A tut quels che suondan questa norma seigi pasch e misericordia, ad els ed agl Israel da Diu!
Egl avegnir duei negin pli dar fastedi a mi. Jeu portel numnadamein las nodas da Cristus vid miu tgierp.
La grazia da Niessegner Jesus Cristus seigi cun vies spért, mes frarsIns sa leger: «mes frars e mias soras».
Amen.
☛ 1. lecziun dalla dumengia: Jes 66,10–14c
☛ evangeli dalla dumengia: Lc 10,1–12.17–20
