dad Andri Casanova
La brev a quels da Colossa ei probabel vegnida scretta d’in scolar da Paulus. Ella presenta a nus in himni da laud per Cristus. Quei himni accentuescha che Cristus ha en tuts graus la preferenza e ch’el stat sur la scaffiziun, tgamuna la Baselgia ed ei naschius sco emprem dils morts.
Quei ein maletgs da speronza che vulan rinforzar la cardientscha e fidonza en Cristus. Podà che quels han vuliu dar curascha alla cuminonza da Colossa suenter in tiaratriembel che ha caschunau unfrendas en in marcau vischinont.
Forsa stuein nus era seregurdar mintgaton dalla muntada da Cristus en vesta a catastrofas da la natira, turpegiusadads en nossa baselgia ni la realitad dalla mort.
Col 1,15–20
Cristus ei la semeglia dil Diu nunveseivel,
igl Empremnaschiu da tut la creaziun.
Pertgei en el ei tut vegniu scaffiu,
quei ch’ei en tschiel e sin tiara,
las caussas veseivlas e las nunveseivlas,
trons e segneradis, dominaziuns e pussonzas;
tut ei scaffiu tras el e per el.
El ei avon che l’entira creaziun,
e tut exista tras el.
El ei il tgau dil tgierp, numnadamein dalla Baselgia.
El ei igl origin,
igl Empremnaschiu dils morts;
aschia ha el en tuts graus la preferenza.
Pertgei Dieus ha vuliu avdar en el cun tut sia plenezia, per reconciliar tut tras el e per menar tut quei ch’ei en tschiel e sin tiara tier Cristus che ha fatg pasch tras siu saung, spons per nus
vid la crusch.
