da Flurina Cavegn-Tomaschett
En sia brev a Timoteus descriva igl autur – probabel in scolar da sogn Paul – co la convivenza enteifer la pleiv duess esser. Cristus ei el center. Odi e dispetas han negin plaz. L’oraziun ei indispensabla.
La brev dat ordras concretas per il dretg proceder dil survetsch divin. Il patratg fundamental da questa part ei igl appel dad urar per tuts carstgauns, oravontut pils regents. L’oraziun sa succeder entras supplicar ni engraziar. La finamira ei ina veta pascheivla ed il beinstar da tuttas e tuts.
La part miez dalla lecziun cuntegn in credo: «Pertgei in sulet ei Diu.»
La davosa construcziun ei l’introducziun ellas leschas da cumportament per differentas gruppas enteifer la cuminonza cristiana. Quella numnada cheu pertucca ils umens.
1 Tim 2,1–8
Oravontut recamondel jeu da far riugs ed oraziuns, supplicas ed engraziaments per tuts carstgauns: per ils regents e per tut ils representants dallas autoritads, sinaquei che nus saveien menar
ina veta ruasseivla e pacifica en tutta pietad e dignitad.
Quei ei bien e plascheivel avon Diu, nies Salvader; el vul che tuts carstgauns daventien salvs e vegnien all’enconuschientscha dalla verdad.
Pertgei
in sulet ei Diu,
ed in sulet ei il mediatur denter Diu ed ils carstgauns:
Il carstgaun Cristus Jesus
che ha unfriu sesez sco spendradira per tuts:
Ina perdetga el dretg temps.
Per tal misteri sun jeu vegnius clamaus sco predicatur ed apiestel – jeu ditgel la verdad e buca manzegnas – sco doctur dils pagauns en cardientscha e verdad.
Jeu vi ch’ils umens fetschien en mintga liug oraziun, alzond lur mauns en schubradad, libers da tutta gretta e dispeta.
