da Flurina Cavegn-Tomaschett
Timoteus era probabel il pli stretg collaboratur da sogn Paul. La brev – probabel scretta d’in scolar da sogn Paul – plidenta Timoteus sco «um da Diu» perquei ch’el stat en stretga relaziun cun Diu. Quella relaziun ei dada a Timoteus entras il Batten. La relaziun ei la basa per prender en mira in’autra finamira che la veta terrestra: quella dalla veta perpetna.
Timoteus duei, malgrad las schliatas cundiziuns ed influenzas, star statteivels e cheutras esser in exempel per auters. L’admoniziun da sogn Paul finescha cun in laud a Diu, il Tutpussent.
1 Tim 6,11–16
Timoteus, ti um da Diu, sesprova da contonscher giustia, pietad, cardientscha, carezia, perseveronza e migeivladad. Batta il bien cumbat dalla cardientscha ed enquera da conquistar la veta
perpetna, alla quala ti eis staus clamaus e per la quala ti has fatg in bien confess avon tontas perdetgas.
Avon Diu che dat veta a mintga creatira, ed avon Cristus Jesus che ha dau sia biala perdetga en fatscha a Pontius Pilatus, recamondel jeu instantamein a ti:
Observa questa missiun senza macla e menda
tochen l’appariziun da Niessegner Jesus Cristus
ch’il tutbeau e sulet Regent
vegn a schar cumparer el temps fixau;
el, il Retg dils retgs e Signur dils signurs,
che posseda sco sulet l’immortalitad,
che avda ella glisch nunaccessibla,
il qual negin carstgaun ha viu e sa era buca veser:
Ad el seigi honur e pussonza perpetna. Amen.
