da ser Jan-Andrea Bernhard
En scola vaiel udiu gia biaras gadas la damonda: Tgei ei il sogn Spert? Jeu vaiel empruau dad explicar, cun differents maletgs e plaids. Ella 2. brev a Timoteus denton dat igl apiestel in avis pratic per capir meglier il sogn Spert: Il sogn Spert semuossa sco spért da forza, da carezia e da prudientscha! La carezia, la forza e la prudientscha gida nus da capir co ch’il sogn Spert sa survegnir fuorma en nossa veta. La carezia duvrein nus per viver culs carstgauns, la prudientscha per decider en situaziuns difficilas e la forza en situaziuns malsegiras ed en tribulaziuns.
Igl apiestel Paulus explichescha che quei spért da forza, da carezia e da prudientscha seigi in’enzenna dalla grazia da Diu. Interessant. Tgi che viva cul spért da forza, da carezia e da prudientscha dat perdetga dalla grazia da Diu.
E Timoteus? El duei seregurdar dil mument che Paulus ha imponiu ils mauns ad el e ch’el ha retschiert quella grazia da Diu entras quei act. E nus? Era nus spirituals havein retschiert ella tras l’imposiziun dils mauns, aber era nus tuts havein retschiert… en quei mument cura che la tatta ha getg: «Bhüat’di Gott!»
2 Tim 1,6–8.13–14
Jeu admoneschel tei, Timoteus: Fai reviver la grazia da Diu che ti has retschiert tras l’imposiziun da mes mauns.
Pertgei Dieus ha buca dau a nus in spért da tema, mobein in spért da forza, da carezia e prudientscha.
Sche buca seturpegia, ni dalla perdetga per nies Segner, ni da mei, siu perschunier, anzi supporta cun mei las tribulaziuns pigl evangeli tras la forza da Diu.
Sco exempel da cardientscha e carezia viers Cristus Jesus pren la sauna ductrina che ti has empriu da mei.
Pertgira il custeivel bein tras igl agid dil Spert sogn che avda en nus.
☛ 1. lecziun dalla dumengia: Hab 1,2–3; 2,2–4
☛ evangeli dalla dumengia: Lc 17,5–10
