da ser Jan-Andrea Bernhard
Veramein: La sontga Scartira cuntegn cussegls sabis, plaids da speronza, da mediaziun e da meditaziun, ni era instrucziuns per ina veta cristifideivla. Igl autur dalla brev a Timoteus percorscha il motiv per quella verdeivladad el fatg che la sontga Scartira seigi inspirada da Diu.
Mintgaton eis ei gnanc schi sempel dad explicar quei a giuvna e pli veglia glieud. Per biars ei il plaid biblic in plaid sper biars auters plaids. E contas gadas udin nus: Oh, quei san ins era interpretar autramein… Surtut sche nus annunziein il plaid da Diu buca mo en muments legreivels cun biala viarva, mobein era en muments difficils ni buca opportuns, gie sche nus perdeghein plaids critics, smanatschein ni admonin.
Jeu sundel perschuadius che nus vein la forza e la curascha da perdegar il plaid da Diu en temps opportuns ni buca opportuns sulettamein sche nus essan ligiai cun Niessegner e Salvader, entras oraziuns, meditaziuns, leger la sontga Scartira e cantar il laud da Diu. Il ligiom cun Jesus Cristus, en nies mintgagi, arva a nus ed a tuts vias e sendas en nossa lavur quotidiana.
2 Tim 3,14–4,2
Timoteus, stai ferms en quei che ti has empriu ed acceptau en tutta perschuasiun. Ti sas, da tgi che ti has empriu ei, pertgei da pign ensi enconuschas ti las sontgas scartiras. Ellas ein el cass
d’intermediar a ti la sabientscha che meina al salit tras la cardientscha en Cristus Jesus.
Mintga cudisch dalla Scartira ei inspiraus da Diu e cheutras nizeivels per instruir, refutar, curreger ed educar ella giustia, sinaquei ch’il carstgaun da Diu seigi cumpleins e habels d’ademplir
scadina bun’ovra.
Jeu congiurel tei avon Diu ed avon Cristus Jesus che vegn a derschar ils vivs ed ils morts ed en vesta a sia vegnida e siu reginavel:
Annunzia il plaid, insista sin la verdad, ch’ei seigi opportun ni buc; avertescha, smanatscha ed admonescha en tutta pazienzia e savieivla instrucziun.
