da ser Jan-Andrea Bernhard
Mintgaton ei la veta in plascher, mintgaton eis ei da purtar cruschs, mintgaton va tut aparti bein, e mintgaton eis ei in cumbat. Quella experientscha ha igl apiestel Paulus gia fatg, avon gleiti 2000 onns.
Alla fin da sia veta mira Paulus tenor la secunda brev a Timoteus anavos ed anavon: Mirond anavos constatescha el ch’el hagi perdegau igl evangeli, la buna nova era als pagauns, mintgaton schizun sut prighel, e mirond anavon sper’el ch’el vegni a meritar la cruna da giustia, suenter quella veta terrena. El ei cunscients ch’il Segner spendra quels che spetgan en carezia siu retuorn.
Quels! S’udin nus era tier quels? «Perdeghein» nus era la buna nova, semussond en nies viver e cumbatter? Meritein nus era la cruna dalla giustia?
Sco buob vaiel adina spitgau il retuorn da Niessegner. Tgei pomai ha Jesus getg: «Sche vus … daventeis buca sco ils affons, saveis vus buc entrar el reginavel da tschiel» (Mt 18,3).
2 Tim 4,6–8.16–18
Jeu vegnel ussa gia unfrius, ed il temps da mia partenza ei damaneivel.
Jeu hai battiu il bien cumbat, hai finiu mia cuorsa e salvau la cardientscha.
Ussa ei preparada per mei la cruna dalla giustia, ch’il Segner, il gest derschader, vegn a dar a mi gliez di, denton buca mo a mi, mobein a tut quels che spetgan en carezia siu retuorn.
Tier mia emprema defensiun (avon dertgira) La parentesa indichescha che quei ei buca numnau el grec, denton gida quella aschunta a capir
meglier. ha negin priu partida per mei, anzi, tuts han bandunau mei. Speronza vegn quei buca teniu a quen ad els!
Mo il Segner ei vegnius en agid ed ha fortificau mei, sinaquei ch’igl evangeli vegni annunziaus perfetgamein tras mei, e che tut ils pagauns possien udir el. Aschia sun jeu vegnius sdrappaus ord
bucca al liun.
Il Segner vegn a spindrar mei da tut mal, gie, el vegn a salvar e menar mei en siu reginavel celestial.
Ad el seigi gloria da perpeten en perpeten. Amen.
☛ 1. lecziun dalla dumengia: Sir 35,12–14.16–18
☛ evangeli dalla dumengia: Lc 18,9–14
