da sora Armina Maissen
Ils apostels san da tgei ch’els plaidan: La perseveronza, quella gronda vertid, vul vegnir nutrida e tgirada sco la cardientscha. Els san che quei rumpeivel scazi drova meinsvart fortificaziun e consolaziun – e quei schenghetg spetgan els en lur oraziun da Jesus Cristus, nies mediatur tier il Bab en tschiel.
Els sezs ein buca memia loschs da sevolver per agid tier ses fideivels, da dar tier ch’era els ein dependents dall’oraziun per vegnir preservai da nauschs e schliats carstgauns. Pertgei igl evangeli sveglia els carstgauns bunas e schliatas reacziuns. Igl ei per els, sco era per ils purtaders digl evangeli dad oz, ina gronda provocaziun.
Ina gada dapli sentin nus, tgei forza che l’oraziun, igl esser reunius cun Diu ha, per nus e per il concarstgaun. L’annunziaziun digl evangeli ei daventada per ils apostels in camond. Sia fidonza en il Segner gida ses fideivels a viver en perseveronza.
Nus vesein: Nies esser cristifideivels consista en ademplir aschi bein sco pusseivel nies pensum cun fidonza sigl agid da Diu.
2 Tes 2,16–3,5
Niessegner Jesus Cristus e Diu, nies Bab, che ha carezau nus e dau a nus en sia grazia la perpetna consolaziun e la buna speronza, vegli consolar vos cors e fortificar vus en scadina buna ovra e
mintga bien plaid.
Plinavon, mes frars Cheu san ins leger «mes frars e mias soras». , urei per nus, sinaquei ch’il plaid da Diu sederasi continuadamein
e vegni glorificaus, sco quei ei stau il cass tier vus.
Urei, per che nus vegnîen preservai da carstgauns nauschs e schliats; pertgei buca tuts anflan la cardientscha. Mo il Segner ei fideivels; el vegn a rinforzar vus e spindrar vus dil mal.
Enten il Segner sefidein nus da vus, che vus fageies uss ed egl avegnir quei che nus vein cumandau.
Il Segner meini vus alla carezia da Diu ed alla perseveronza da Cristus.
☛ 1. lecziun dalla dumengia: 2 Mac 7,1–2.9–14
☛ evangeli dalla dumengia: Lc 20,27–38
