da Flurina Cavegn-Tomaschett
La tensiun che selai sentir egl esser carstgaun descriva sogn Paul exemplarmein en duas persunas. Ellas vegnan buca numnadas per num, denton el context eis ei evident: ei setracta dad Adam e Jesus Cristus. Entras il puccau digl in ei la mort vegnida el mund, entras l’obedientscha da l’auter ei nova veta vegnida regalada. Omisdus ein da veser sco persunalitads corporativas: En lur persuna ein gia ils vegnentssuenter includi. En quei senn – e buca el senn historic – ei il puccau dils descendents dad Adam ed ils «descendents» da Cristus da capir.
Adam stat pia per la carstgaunadad. Ils carstgauns ein naven dall’entschatta i atgnas vias e sedistanziai dils camondaments da Diu. Pér en Jesus Cristus ei quella distanza vegnida surmuntada.
Ro 5,12.17–9
Mes cars! Cul puccau stat ei aschia: Tras in sulet carstgaun ei il puccau entraus en quest mund, e tras il puccau la mort, ed aschia ei la mort ida vi sin tuts carstgauns, perquei che tuts han
fatg puccau.
Mo sche la mort ha tras il surpassament da quei sulet regiu per cuolpa dad in, tonpli vegnan quels che retscheivan l’abundonza dalla grazia e dil dun da giustia a reger en la veta tras quei
sulet, Jesus Cristus.
Ei stat pia aschia: Sco il malfatg dad in sulet ha menau tuts carstgauns alla condemnaziun, aschia ha era l’ovra da giustia dad in sulet procurau a tuts carstgauns la giustificaziun che dat la
veta.
Pertgei sco tuts ein tras la malobedientscha dad in carstgaun vegni quintai per pucconts, aschia vegnan tuts tras l’obedientscha dad in sulet quintai per gests.
☛ 1. lecziun dalla dumengia: Gen 2,7–9; 3,1–7
☛ evangeli dalla dumengia: Mt 4,1–11
