da sora Armina Maissen
Igl ei buca adina lev da prender part dil pitir da Cristus, pertgei quel semuossa en biaras variaziuns en nies mund, seigi quei en plaids che carsinan e cugliunan, ni en beffas e leffas. Cun la cardientscha e la fidonza en Cristus survegnin nus denton forza e sentiment da distinguer il bien dil mal, pertgei il Spert da Diu ruaussa sin nus, sin nossa perseveronza.
Biars carstgauns sin nies mund ston pitir brutalmein, perquei ch’els ein cristians. Els drovan nossa oraziun. En nossa patria sentin nus buca quella sgarscheivla tensiun e crudeivladad. Essan nus denton avunda pertscharts ch’ei va en quei senn memia bein cun nus e che nies beinstar ei prighel da sminuir nossa cardientscha e far nus indifferents.
Perquei: Spert da Diu, neu e dai a nus perseveronza e ruaussa sin nus. Amen.
1 Pd 4,13–16
Mes cars! Selegrei che vus astgeis prender part dil pitir da Cristus, sinaquei che vus saveies era giubilar plein legria cu sia gloria vegn a semussar.
Beai vus, sche vus stueis tedlar beffas e leffas per amur dil num da Cristus; pertgei il Spert dalla gloria, il Spert da Diu ruaussa sin vus.
Mo negin da vus duei stuer pitir perquei ch’el ei in assassin, in lader u malfatschent ni perquei ch’el semischeida en fatgs dils auters. Sch’enzatgi sto denton pitir perquei ch’el ei in
cristian, duei el buca seturpegiar, mobein glorificar Diu en quei num!
☛ 1. lecziun dalla dumengia: Fatgs 1,12–14
☛ evangeli dalla dumengia: Gn 17,1–11a
