Unitatis redintegratio

2. […]

3. En questa Baselgia da Diu ch’ei ina e suletta, ein divisiuns carschidas gia d’entschatta enneu (cf. 1 Cor 11,18–19; Gal 1,6–9; 1 Gn 2,18–19). Quellas ein vegnidas condemnadas digl apiestel cun ferms plaids (cf. 1 Cor 1,11ss.; 11,22). El decuors dils tschentaners ha ei dau discordias pli vastas, e cuminonzas considerablas ein sedistaccadas dalla pleina communio dalla Baselgia catolica, savens per cuolpa da carstgauns dad omisduas partidas. Mo la cuolpa da separaziun astga buca vegnir attribuida a quels che neschan en nies temps en quellas cuminonzas e che vegnan instrui leu en la cardientscha da Cristus. La Baselgia catolica circumdat els cun respect fratern ed en carezia. Pertgei quels che crein en Cristus e che han retschiert valeivlamein il batten, stattan en ina certa communio – senza che quella fuss perfecta – cun la Baselgia catolica. Per franc caschunan las differentas discrepanzas denter quels e la Baselgia catolica en connex cun la ductrina e meinsvart cun la disciplina ni en connex cun la structura dalla Baselgia buca paucs impediments, gie mintgaton schizun gronds, per contonscher la pleina communio ecclesiala. Il moviment ecumen sestenta da surmuntar quels obstachels. Nuotatonmeins ein els [v.d. ils cristians dad autras confessiuns] entras la cardientscha giustificai el batten (cf. Concil da Florenza) e perquei eis ei dueivel ch’els portan il num da cristians, e cun raschun vegnan els considerai dils affons dalla Baselgia catolica sco frars e soras el Segner (cf. s. Augustin).

Leutier vegn ei ch’entgins, anzi, che biars ed impurtonts elements ni beins, dils quals la Baselgia sezza ei construida e survegn veta, ein era d’anflar ordeifer ils cunfins veseivels dalla Baselgia catolica: il plaid da Diu en fuorma screta, la veta dalla grazia, la cardientscha, la speronza e la carezia, sco era auters duns dil Spert sogn ed elements veseivels. – Tut quellas caussas che derivan da Cristus e che meinan tier el audan cun raschun all’unica Baselgia da Cristus.

Era numerusas acziuns liturgicas dalla religiun cristiana vegnan exequidas dils frars e soras separai da nus. Ellas pon sin differentas modas e tenor las diversas concepziuns da mintga Baselgia e Cuminonza senza dubi generar la veta dalla grazia e vegnir considerai sco mieds adattai per dar access alla cuminonza dil salit.

Medemamein ein quellas Baselgias (cf. 4. Concil lateran) e Cuminonzas separadas buca senza muntada e valur per il misteri dil salit, malgrad ils deficits ch’ellas ston supportar tenor nossa cardientscha. Il Spert da Cristus ha numnadamein buca refusau da far diever dad ellas sco instruments dil salit. La forza e vigur leutier deriva dalla medema plenezia dalla grazia e verdad ch’ei affidada alla Baselgia catolica.

[…]

4. […]

Ils fideivels da confessiun catolica […] duein oravontut sezs considerar sinceramein e cun diligenza tgei che duei vegnir renovau e realisau enteifer la famiglia catolica sezza. Sinaquei che sia veta detti ina perdetga pli fideivla e clara della ductrina e dellas instituziuns dadas da Cristus entras ils apostels.

Pertgei, era sche la Baselgia catolica ei vegnida enrihida da tut la verdad revelada da Diu e da tuts ils mieds de grazia, sesurveschan ses commembers tuttina buca de tut quei per viver cun la duida fervur. […]

Ils catolics duein renconuscher cun legria e stimar las valurs veramein cristianas che vegnan neu dal patrimoni communabel e che sesanflan tier ils frars separai. Renconuscher las rihezias de Cristus e las ovras de vertid ella veta dils auters che dattan aschia perdetga de Cristus.

Ins duei mai emblidar che tut quei che vegn cumpleniu dalla grazia dil Spert Sogn els frars separai sa contribuir a nossa edificaziun. Tut quei ch’ei veramein cristian ei mai cuntrari als beins della cardientscha, anzi sa adina far ch’il misteri sez de Cristus e della Baslegia seigi cuntonschius pli perfetgamein.

[…]

[…]

6. Scadina refuorma della Baselgia consista essenzialmein enten esser pli fideivla a sia vocaziun. Perquei ston ins veser en sia refuorma senza dubi la vera raschun dil moviment viers l’unitad. La Baselgia pelegrina ei clamada da Cristus a questa cuntinuada refuorma, della quala ella ha adina da basegns, schi lunsch ch’ella ei ina instituziun humana e terrestra. Sch’ei dat pia entginas caussas, seigi ellas isonzas ni ella disciplina ecclesiastica, ed era ella moda d’annunziar la ductrina – caussa ch’ins sto distinguer cun quitau dal ver e propi cuntegn [deposit] della cardientscha – ch’ein vegnidas observadas meins accuratamein en consequenza dellas circumstanzias, lu duein quellas vegnir messas puspei el gest e dueivel uorden.

Quella refuorma ha consequentamein ina impurtonza ecumenica singulara. Las pli variadas modas e manieras ellas qualas tala refuorma della veta della Baselgia ei gia actuala ston vegnir consideradas sco garanzias e bunas enzennas che annunzian legreivlamein ils progress futurs digl ecumenissem. Ei stracta cheu denter quei ch’ei gia actual dil moviment biblic e liturgic, dell’annunziaziun dil Plaid de Diu e della catechesa, digl apostolat dils laics, de novas fuormas de veta religiusa, della spiritualitad della lètg, della ductrina e dell’activitad della Baselgia sin camp social. […]