dad Andri Casanova
![](https://image.jimcdn.com/app/cms/image/transf/dimension=151x1024:format=png/path/se84bbe62333bbd55/image/i89a47e7ae5a2e7ad/version/1711537208/image.png)
Sil pli tard da Pastgas eis ei indicau da seregurdar, tgei ch’ei munta dad esser battegiaus e dad aschia esser cristian: Entras il batten essan nus uni cun Cristus, cun sia mort e cun sia levada. Quei ligiom che regala a nus spindrament ei regalaus a nus. Nus essan leventai en Cristus. Quei sa negin prender da nus. Nus vein art e part dalla veta celestiala.
Deplorablamein ei tut quei pil pli buc veseivel e tschaffabel. Nus essan denton clamai dad «satisfar» a quei fatg. Cheu gida ei dad adina puspei ver Cristus avon egl, el ch’ei levaus dils morts e sesa en tschiel da vart dretga da Diu. Quella egliada po regalar a nus in surrir, in surrir che lai ir nus sin autra moda atras nossa veta. Quei surrir e quella legria da Pastgas duei accumpignar nus.
Col 3,1–4
Vus essas leventai cun Cristus; perquei encuri quei ch’ei en tschiel, nua che Cristus sesa da vart dretga da Diu. Drizzei voss’egliada sin quei ch’ei en tschiel e buca sin quei ch’ei sin
tiara.
Vus essas gie morts, e vossa veta ei zuppada cun Cristus en Diu.
Mo cu Cristus, nossa veta, vegn a cumparer, lu vegnis era vus a cumparer ensemen cun el en gloria.
![](https://image.jimcdn.com/app/cms/image/transf/dimension=337x10000:format=jpg/path/se84bbe62333bbd55/image/ib6ede6fd4393190c/version/1711531853/image.jpg)
☛ 1. lecziun dalla dumengia: Fatgs 10,34a.37–43
☛ evangeli dalla dumengia: Gn 20,1–9