da Marcel Köhle
El center da questa lecziun da dumengia stat il clom da daventar in «niev carstgaun». Las expressiuns «trer ora il carstgaun vegl» e «trer en il carstgaun niev» che nus legin cheu, han lur ragischs ella teologia dil batten. Ella fiasta da batten gioga perquei era il vestgiu da batten ina rolla impurtonta. El muossa che nus (sco battegiai) vein «tratg en Cristus» e sespruein da drizzar ora nossa veta tenor el.
Quei punct ei era al scriptur dalla brev a quels dad Efesus impurtonts. El less dir a sias lecturas ed a ses lecturs ch’els, sco persunas battegiadas, duein era viver aschia, sco sch’els vessen tratg en Cristus. Quei vul dir: suandar Cristus cun plaid e fatg, sco era viver tenor siu evangeli e ses condaments!
Esser cristifideivels exprima igl autur culs plaids: viver «en giustia e sontgadad». – Sco nus targein en vestgadira, sto era nossa cardientscha daventar veseivla per ils concarstgauns. La finamira fuss che tschels vesan che nus sespruein da viver a moda gesta e sontga sco Jesus ha mussau a nus.
Ef 4,17.20–24
Mes cars! Jeu ditgel ed admoneschel vus enten il Segner: Buca viandei pli sco ils pagauns che vivan ella vanadad da lur patertgar.
Vus veis gie buc empriu d’enconuscher Cristus aschia. Vus veis udiu dad el ed essas vegni instrui davart el, co la verdad ei enten Cristus.
Targei ora il carstgaun vegl che vegn lavagaus da gargiaments surmenonts, midei vossa veta da pli baul e renovei vies sentir e patertgar.
Targei en il carstgaun niev ch’ei scaffius tenor Diu en giustia e sontgadad che derivan dalla verdad.
☛ 1. lecziun dalla dumengia: Ex 16,2–4.12–15
☛ evangeli dalla dumengia: Gn 6,24–35
