da sur Marcus Flury
Ils capitels 11 e 12 dalla brev als Hebrès plaidan dalla cardientscha. Quella brev ei drizzada a cartents ch’ein daventai staunchels e malsegirs quei che pertucca la cardientscha. Perquei vegn ei accentuau che cardientscha ei dapli che tener per ver certas caussas. Cardientscha sebasa sin la fideivladad da Diu e sa s’orientar vid impurtonts carstgauns sco Abraham, che vegn numnaus il bab da nossa cardientscha e ch’ei staus promts d’unfrir siu sulet fegl Isac. Cardientscha ei speronza. Uestg Joseph Maria Bonnemain ha inaga detg: Haver pazienzia cun Diu ei cardientscha. Ella pazienzia semuossa quella fidonza e speronza ella fideivladad divina.
Heb 11,1–2.8–19
Mes frarsCheu san ins leger «Mes frars e mias soras».! La cardientscha ei ina ferma fidonza da quei ch’ins spera, la cumpleina
perschuasiun da caussas ch’ins vesa buc. Sin fundament d’ina tala cardientscha han ils antenats meritau in bien attestat.
En cardientscha ha Abraham obediu al clom da tilar naven viers ina tiara ch’el dueva retscheiver en ierta; ed el ei partius senza saver, nua ch’el mondi. En cardientscha eis el vegnius e secasaus
ella tiara empermessa sco en ina tiara jastra, ed el ei vivius leu en tendas ensemen cun Isac e Jacob, ils cunartavels dalla medema empermischun. El spitgava numnadamein il marcau culs ferms
fundaments, dil qual Dieus sez ei architect e construider.
En cardientscha ha perfin Sara retschiert la forza da daventar mumma malgrad sia vegliadetgna, pertgei ella ha teniu per fideivels quel che veva dau l’empermischun.
Aschia deriva dad in sulet, dad in um ch’era gia signaus dalla mort, ina descendenza aschi numerusa sco las steilas vid il firmament e nundumbreivla sco il sablun alla riva dalla mar.
