da Maria Cristina Derungs-Bartolomei
El cuort schatg de quella lecziun seconcentrescha in pign tractat teologic che muossa silla finamira e cumplenida de Pastgas, pia sil coc e motor della veta en cardientscha, numnadamein l’ovra dil Sogn Spert. Mo tras el savein nus renconuscher Jesus sco Signur, haver access al Bab ed alla communiun della Trinitad.
La cuminonza de Corint fuva fetg viva, denton era caracterisada da divisiuns internas, da luschezia e dad in entusiassem sfrenau. Quei caschunava disuorden e sviaments. Perquei tschenta sogn Paul ils accents silla harmonia e medema dignitad dellas diversitads, che han l’unitad sco rama ed intent. Enstagl de segloriar dils fenomens bizars (discuorer auters lungatgs eav.), vegnan ils duns de grazia valorisai, las differentas activitads e forzas, tuts cumpri sco survetschs pigl avantatg communabel. Quei san ins capir meglier cun leger igl entir capetel, magari ensemen cun quel che suonda. In bi «schenghetg» ch’ins sa far a sesez per festivar Tschuncheismas.
1 Cor 12,3b–7.12–13
Negin sa dir: Jesus ei il Segner! auter che enten il Spert sogn.
Ei dat differents duns spirituals, il Spert ei denton il medem. Ei dat differents survetschs, denton mo in sulet Signur. Ei dat differentas forzas, Dieus ei denton il medem che operescha tut en
tuts. A scadin vegn la revelaziun dil Spert dada pil beinstar general.
Pertgei sco il tgierp ei mo in ed ha tonaton biara membra, e sco tut la membra dil tgierp fuorma, malgrad sia pluralitad, mo in tgierp, aschia era Cristus.
Pilver, nus tuts essan vegni battegiai en in Spert per daventar in sulet tgierp, ton Gedius sco Grecstier ils battegiai dat ei tals da
provegnientscha giudaica (Gedius) ed auters (Grecs), ton sclavs sco libers. E nus tuts essan vegni bubrentai cul medem Spert.
